May-akda: Roland “Rolly” Soliven

Hanggang Kailan Nga Ba Kita Mamahalin?...

….Hanggang ang Liwanag ay papalit sa dilim ng ating daigdig.

… Hanggang may Ulap na ngingiti’t matatanaw sa bawat paghilig.

… Hanggang may Ambon na sa bawat bulaklak ay marahang didilig.

… Hanggang Irog may mga Rosas na mamumukadkad.

… Hanggang may Talulot na maiaalay sa ‘yong mga palad.

… Hanggang may Samyong malalanghap habang naglalakad.

… Hanggang ang Ganda’y maihahandog sa Pag-ibig na lahad.

… Hanggang Giliw may Nektar na sa paru-paro ay nagpapagilas.

… Hanggang ang Ulan na pandilig n’ya ay tuloy na tatagas.

… Hanggang ang pagkabaon ng mga Ugat n’ya ay kapit at wagas.

… Hanggang ang Dahon at Tinik n’ya ay may taglay na talas.

… Hanggang ang Diwa’y ginigising ng kanyang halimuyak.

… Hanggang ang Rikit n’yang taglay ay gamit panggayak.

… Hanggang sa Balana’y may hatid na ngiti at galak.

… Hanggang Pag-ibig ko sa’yo ay tuloy na pinag-aalab.

… Hanggang mga Ibon sa sanga  ay nagsisihuni at nagsisilipad,

… Hanggang may Dahong sa hangin ay sasama kahit saan mapadpad.

… Hanggang may damo na tutubo’t lalago sa lupang malapad.

… Hanggang may binhing lilisan na tumubong muli ang tangi at hangad.

… Hanggang may  Alon na hahampas at hahalik sa dalampasigan.

… Hanggang may  Agos na umaawit habang bumabaybay sa mga batisan.

… Hanggang ito’y malakas na babagsak sa Talon ng walang pagsidlan.

… Hanggang ang lahat ay tutuloy sa piling n’yaring Haring Karagatan.

… Hanggang o Hirang ko Ako’y humihinga.

… Hanggang ang Puso ko’y pipintig pagdaka.

… Hanggang tangan ko ang Buhay na pahiram ni Ama.

… Hanggang kahit pa sa Dakong Paraiso na pangako Niya.

… Hanggang ang Diwa ay kaya pang umisip ng mga salita.

… Hanggang may babasa pa’t maaaliw sa ’king mga Tula.

… Hanggang hitik ang Panitik ng Abang Lingkod na Makata.

…

…… HANGGANG ANG HANGGANAN MAHAL KO…

……. MABATID MONG

…….. WALA !!!